ນັກສຶກສາ ມຊ ຮຽນຮູ້ການປະຕິບັດ ເປົ້າໝາຍ ພັດທະນາແບບຍືນຍົງຢູ່ລາວ

ໃນຕອນເຊົ້າ​ວັ​ນ​ທີ 24 ຕຸ​ລາ ນີ້, ກົມ​ອົງ​ການ​ຈັດ​ຕັ້ງ​ສາ​ກົນ ກະ​ຊວງ​ການ​ຕ່າງ​ປະ​ເທດ ​ໄດ້​ຈັດກອງ​ປະ​ຊຸມ​ເຜີຍ​ແຜ່ການ ຈັດຕັ້ງປະຕິບັດ ເປົ້າ​ໝາຍ​ການ ​ພັດ​ທະ​ນາ​ແບບ​ຍືນ​ຍົງ (SDGs) ​ໃຫ້​ແກ່​ພະນັກງານຄູອາຈານ ແລະ ນັກ​ສຶກ​ສາ​ ຈຳ​ນວນ 300 ກວ່າຄົນ ຢູ່ມະ​ຫາ​ວິ​ທະ​ຍາ​ໄລ​ແຫ່ງ​ຊາດ ພາຍ​ໃຕ້​ການ​ເປັນ​ປະ​ທານ​ຂອງ​ທ່ານ ຄຳ​ອິນ ຄິດ​ຈະ​ເດດ, ຫົວ​ໜ້າ​ກົມ​ ອົງ​ການ​ຈັດ​ຕັ້ງ​ສາ​ກົນ, ກະ​ຊວງ​ການ​ຕ່າງ​ປະ​ເທດ ທັງ​ເປັນ​ຫົວ​ໜ້າ​ ກອງ​ເລ​ຂາ​ຄະ​ນະ​ຊີ້​ນຳ​ລະ​ດັບ​ຊາດ, ເພື່ອຕິດຕາມ​ການ​ ຈັດ​ຕັ້ງ​ປະ​ຕິ​ບັດ​ເປົ້າ​ໝາຍ​ການ​ ພັດ​ທະ​ນາ​ແບບ​ຍືນ​ຍົງ​ ໂດຍ​ມີທ່ານ ອຸດົມ ພອນຄໍາເພັງ ຮອງອະ​ທິ​ການ​ບໍ​ດີ ມະ​ຫາ​ວິ​ທະ​ຍາ​ໄລ​ແຫ່ງ​ຊາດ ໃຫ້​ກຽດ​ເປັນ​ປະ​ທານ​ຮ່ວມ.
ນັກວິທະຍາກອນຈາກ ກະຊວງການຕ່າງປະເທດ ແລະ ກະຊວງແຜນການ ແລະ ການລົງທຶນ ໄດ້​ຊີ້​ໃຫ້​ເຫັນ ກ່ຽວກັບເປົ້າໝາຍ ການພັດທະນາແບບຍືນຍົງ ແລະ ການເຊື່ອມສານເປົ້າໝາຍດັ່ງກ່າວ ເຂົ້າ ໃນແຜນພັດທະນາ ເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 8 ກໍຄື ຍຸດທະສາດການ ພັດທະນາເສດຖະກິດ-ສັງຄົມ ຮອດປີ 2025 ແລະ ວິໄສທັດ ປີ 2030 ຂອງ ສປປ ລາວ ເພື່ອໃຫ້ຜູ້ເຂົ້າຮ່ວມ ທັງໝົດມີຄວາມຮັບຮູ້ເຂົ້າໃຈ ກ່ຽວກັບເປົ້າໝາຍການ ພັດທະນາຂອງສາກົນ ແລະ ຂອງປະເທດ.​ ໃນທ້າຍປີ 2015, ຜູ້ນຳຂອງ 193 ປະເທດສະມາຊິກ ອົງການສະຫະປະຊາຊາດ, ລວມທັງທ່ານ ຈູມມາລີ ໄຊຍະສອນ, ປະທານປະເທດ ແຫ່ງ ສປປ ລາວ ໄດ້ເຂົ້າຮ່ວມ ກອງປະຊຸມສຸດຍອດ ອົງການສະຫະປະຊາຊາດ ເພື່ອຮັບຮອງເອົາວາລະການ ພັດທະນາໃໝ່ຂອງສາກົນ ທີ່ເປັນປະຫວັດສາດ ທີ່ເອີ້ນວ່າ “ຫັນປ່ຽນໂລກຂອງ ພວກເຮົາ: ວາລະ 2030 ເພື່ອການພັດທະນາແບບຍືນຍົງ”, ເຊິ່ງລວມເຖິງເປົ້າຫມາຍ ການພັດທະນາ ແບບຍືນຍົງ ທີ່ກວມ​ເອົາດ້ານ​ເສດ​ຖະ​ກິດ, ສັງ​ຄົມ ແລະ ສິ່ງ​ແວດ​ລ້ອມ ລວມທັງ​ໝົດ 17 ເປົ້າ​ໝາຍ​.
ນອກຈາກການ ຈັດຕັ້ງປະຕິບັດ ເປົ້າໝາຍການພັດທະນາ ແບບຍືນຍົງຂອງສາກົນ ໃນ 15 ປີຕໍ່ໜ້າ ລັດຖະບານ ສປປ ລາວ ຍັງໄດ້ຮັບຮອງເອົາເປົ້າໝາຍການ ພັດທະນາແບບຍືນຍົງ ທີ 18 “ ຊີ​ວິດ​ທີ່​ປອດ​ໄພ​ ຈາກ​ລະ​ເບີດທີ່ຍັງບໍ່​ທັນ​ແຕກ” ໃນທ້າ​ຍ 2016 ທີ່ນະຄອນຫລວງ​ວຽງຈັນ, ໂດຍທ່ານທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ບັນກີ-ມູນ ເລຂາທິການ ໃຫຍ່ອົງການສະຫະປະຊາຊາດ ໃນໂອກາດທີ່ເດີນທາງ ມາຮ່ວມກອງປະຊຸມສຸດຍອດອາຊຽນ-ອົງການສປຊ, ເຊິ່ງເປັນການ ສານຕໍ່ຄວາມພະຍາຍາມ ຈັດຕັ້ງປະຕິບັດເປົ້າໝາຍ ສະຫັດສະວັດ ດ້ານການພັດທະນາ ທີ 9 ກ່ຽວກັບການແກ້ໄຂ ຜົນກະທົບຂອງລະເບີດ ທີ່ບໍ່ທັນແຕກຢູ່​ລາວ.

===================

ພາບແລະຂ່າວ: Pathedlao Lao

发表评论

电子邮件地址不会被公开。